Rusiye, Ukrayina ve ABD eyyetleriniñ yañı körüşüvi fevralniñ 1-ne Abu-Dabide olacaq, dep bildirdi yanvarniñ 28-nde Rusiye prezidenti Vladimir Putinniñ matbuat kâtibi Dmitriy Peskov.
Peskov muzakerelerni "hassas ve pek qıyın" dep adlandırdı.
Ukrayina prezidenti Volodımır Zelenskıy de muzakereler bu afta devam etecek, dep aytqan edi.
Yanvarniñ 23-nde ve 24-nde cenk başlağanından berli ilk sefer Abu-Dabide ABD, Rusiye ve Ukrayina eyyetleriniñ cenkni bitirmek içün üç taraflı muzakereleri olıp keçti. Rusiye eyyetiniñ başı Baş istihbarat idaresiniñ arbiy istihbarat yolbaşçısı oldı, Ukrayina tarafından ekspertlerden ğayrı, siyasetçiler de iştirak etti, hususan Prezident ofisi ve Milliy telükesizlik ve mudafaa şurasınıñ kâtibi de.
Muzakerelerniñ nevbetteki raundı fevralniñ 1-nde ola bile, dep yazdı Axios neşiri adı aytılmağan Amerika memurınıñ malümatına esaslanıp. Neşir subetdeşlerinden biri taraflar Rusiye ve Ukrayina prezidentleriniñ körüşüv imkânını ve "Putin ve Zelenskıy körüşüvine pek yaqın olğanlarını muzakere ettiler, dep bildirdi.
Rusiye prezidentiniñ yardımcısı Yuriy Uşakov yanvarniñ 28-nde Ukrayina prezidenti Volodımır Zelenskıy Vladimir Putinnen körüşmege istese, o, Moskvağa kele bile, anda telükesizligi kefil etilecek, dep ayttı. Zelenskıy Putinnen körüşmege azır olğanını, amma körüşüv Moskvada olmaz, dep aytqan edi.