Kreml, salı künü aqşam yayınlanğan ABD Devlet Departamentiniñ insan aqlarına riayet etüv aqqındaki esabatında Rusiye ile bağlı neticelerge razı degil.
Bunı çarşenbe künü jurnalistlerge Rusiye prezidentiniñ matbuat kâtibi Dmitriy Peskov bildirdi.
«Vesiqanıñ tekrarlanğan tezisleri bar. Eki taraflı munasebetlerimiz angi derecede olğanına köre, de köterile, de aşağı tüşe. Elbette biz buña razı degilmiz, munasebetimiz de buña aynı», – TASS Peskovnıñ aytqanlarından alıntı ketire.
Martnıñ 30-nda ABD Devlet Departamenti 2020 senesi içinde insan aqları vaziyeti aqqında esabat yayınladı. Şu esabatta Rusiye Qırımnı işğal etkeni içün tenqit etilgen.
2020 senesi insan aqları esabatınıñ «Qırım Ukraina» bölüginde «küç organlarnıñ suistimalı, mecburiy qaçırmalar ve iskenceler aqqında» yazıla.
Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
