Kremençukta Rusiyeniñ ticaret-eglence merkezine raketa ücümi neticesinde eñ azı 10 adam öldi, 40-tan çoq yaralandı. Bunı Poltava vilâyetiniñ arbiy memuriyetiniñ başı Dmıtro Lunin haber etti.
"21 kişi yaralandı ve hastahanege yatqızıldı. Olardan 6-sı ağır alda. Bundan ğayrı daa 29 adamğa ambulator yardım kösterlidi, olardan ekisi bala", - dep haber etti o.
Facia yerine kelgen Ukrayina İİN reberiniñ mesleatçısı Anton Geraşçenkonıñ sözlerine köre, Kremençukta dağıntılarnı cıyıştırmaq içün territorial mudafaası ve göñülliler qoşulğan.
"Mümkün qadar tez adamdlarnı dağıntılar tübünden çıqarmaq içün olar qurtarıcılarğa yardım eteler. Balaban qanatlı raketanıñ darbesinden binanıñ damı parçalandı, onıñ viraneliri astında pek çoq yaralı adam ola bile", - dep bildirdi o.
Evel Volodımır Zelenskıy Kremençukta Rusiye raketası barıp urğan ticaret-eglence merkezinde biñden çoq adam buluna bilecegini bildirdi.
Poltava vilâyetiniñ arbiy memuriyetiniñ başı Dmıtro Lunin ticaret merkezine raketa darbesiniñ endirilmesine "ruslarnıñ insanlıqqa qarşı daa bir arbiy cinayeti" dedi.
Rusiye arbiyleri kremunçuktaki ticaret merkezine ücümni daa izaatlamadılar.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
