Rusiye Tahqiqat komiteti bildire ki, Krasnoyarsk ülkesiniñ Yenisey rayonındaki Abalakovo qasabasında mektepte yüz bergen adisede yaralanğanlar yoq.
Haber etilgenine köre, yanvarniñ 25-nde saba doquzıncı sınıf talebesi mektep yanında pencere ve maşinalarğa ateş açtı, binağa kirip olamadı.
«Tahqiqatçılar adise yerinde buluna, mektep talebesini, sınıfdaşlarını ve ocalarını sorğuğa çeke», – dep bildire Krasnoyarsk ülkesindeki Tahqiqat komitetiniñ idaresi.
Rusiye tahqiqatçıları tahqiqattan evel teşkerüv başlattı.
Rusiye kütleviy haber vastaları Krasnoyarsk ülkesiniñ Yenisey rayonındaki Abalakovo qasabasında talebe mektepte ateş açtı, dep bildirgen edi.
Abalakovo köyünde 1,5 biñ insan yaşay, anda tek bir mektep bar.
2018 senesi oktâbrniñ 17-nde Keriç politehnik kollecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik kollecinde olğan patlavnı terror ücümi olaraq tasnif ete.
