Rusiye mahkemesi Krasnoperekopsk rayonınıñ sakinine içtimaiy ağda «Rusiye ordusını itibardan tüşürgen» paylaşuvnı begengeni içün 45 biñ ruble para cezasını berdi.
Rusiye kontrolindeki Krasnoperekopsk rayon mahkemesiniñ matbuat hızmeti bildirgenine köre, laf «Odnoklassniki» Rusiye içtimaiy ağında bir paylaşuv aqqında kete.
«Mahsus arbiy operatsiyanı keçirgen Rusiye Federatsiyasınıñ Silâlı Quvetlerini itibardan tüşürgen açıq areketler, diger vatandaşlarnıñ aq ve serbestliklerine sayğısızlıq, vatandaş Rusiye Federatsiyası memuriy uquq bozuvlarınıñ 20.3.3 maddesiniñ 1-inci qısmına istinaden mesüliyet taşımalı. Mahkeme oturışuvında qadın qabaatını tanımayıp, Rusiye Federatsiyası silâlı quvetlerini itibardan tüşürgen bir malümatnı saifesinde paylaşmadı, «kerçeklerni» yazdı, dep añlattı», – dep aytıla haberde.
Qadınnıñ adı ve soyadı aydınlatılmay, bu davanen bağlı izaatları yoq. Rusiye mahkemesi paylaşuv neden ibaret olğanını bildirmey.
Berilgen malümatqa köre, Canköyde Rusiye akimiyeti pensionerni «Odnoklassniki» içtimaiy ağında cenkke qarşı paylaşuv yapqanı içün 35 biñ ruble para cezasını berdi.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
