Rusiye regional akimiyeti haber etkenine köre, Ukrayina uçucısızlarınıñ ücümi sebebinden Rusiye Federatsiyasınıñ Krasnodar ülkesindeki Volna qasabasında dekabrniñ 21-nde ve 22-ne keçer gecesi boru, eki gemi ve eki iskele zarar kördiler. Bu aqta Krasnodar ülkesi Operativ ştabınıñ Telegram kanalı haberinde aytıla.
Haberge köre, Volna qasabasındaki terminallardan birinde boru uçucısız parçalarından zarar kördi. "Yaralanğanlar yoq. Yanğın yeri 100 metr kâre oldı", – dep aytıla haberde.
Bundan ğayrı, ştab bildirgenine köre, zarar körgen gemilerde bulunğanlar tahliye etildi, yaralanğanlar olmadı.
"İskelelerde 1 biñ metr kâreden 1,5 biñ metr kârege qadar meydanda yanğınlar oldı. Şimdi faal sürette söndürile", – dep bildire regional akimiyet.
Ukrayina tarafı ücümni şimdilik izaatlamadı.
Volna qasabası işğal etilgen Qırımnı Rusiyenen birleştirgen Keriç köprüne yaqın yerleşe.
Ukrayina Krasnodar ülkesine muntazam sürette darbe endire, hususan, Kyivniñ bildirgenine köre, Kremlniñ arbiy ğayretlerine maliye etken energetika obyektlerini nişan ala.
