İyünniñ 28-nde Ukrayina Fevqulâde vaziyetler hızmeti, Donetsk vilâyetindeki Kramatorsk şeerine aqşam endirilgen Rusiye rakete darbesi neticesinde ölgenderniñ sayısı 8, yaralanğanlarnıñ sayısı 56 olğanını bildirdi.
"İyünniñ 28-nde sabaa saat 7 itibarınen dağıntılar tübünden 8 ölüniñ cesedi çıqarılğan, olarnıñ arasında 3 bala. 56 kişi yaralanğan, olarnıñ arasında 2022 senesi doğma bir bala", - dep haber etile bildirmede.
Qurtarıcılarnıñ malümatına köre, yıqılğan binanıñ dağıntıları cıyıştırıla ve büyük ihtimalnen dağıntılar tübünde qalğan adamlarnıñ qıdıruvı devam ete.
İyünniñ 27-nde RF ordusı Kramatorsknıñ merkezine raketa darbesini endirdirgen edi.
Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
