Qırımda “Krımtelekom” şirketiniñ satılğanı aqqında bildireler. Qırım habercileri bergen malümatqa köre, “İnfrastruktura leyhalarınıñ idare şirketi” (İLİŞ) Aqmescit Açıq Aktsioner Cemiyeti (AAC), “Krımtelekom” şirketiniñ 100% aktsiyalarını açıq mezatta 998 million rublege satın aldı.
Konkursta eki AAC iştirak etti - “İLİŞ” (Aqmescit) ve “Sarıç” (Aqyar). Şirketlerniñ ekisi de 199,6 million rublelik peyni töledi.
“Krımtelekom” şirketi, iş adamı Rinat Ahmetovğa ait olğan “Ukrtelekom”nıñ Qırım bölüginiñ esasında 2015 senesi fevral ayında tizildi. Qırım ilhaqından soñ, Ahmetov, bir yılğa qadar onı idare ete bildi.
2015 senesi fevralde “Ukrtelekom”, Qırımnı qıta Ukrainanen bağlağan optika-lif magistral teliniñ ayırıluvı yapılğanını bildirdi. Aynı zamanda, Rusiye nezareti astındaki Qırım akimiyeti, “Ukrtelekom”nı ağ söndürüvinde qabaatladı.
2015 senesi fevral 11-inde Qırım akimiyeti, “Ukrtelkom”nıñ Qırım bölüginiñ devletleştirüvini ilân etti.
