İşğal etilgen Qırım sakinleriniñ sayısı 2014 senesinden berli tahminen 20 biñge arttı, dep bildirdi Qırım ve Aqyardaki Rusiye kontrolindeki statistika idaresiniñ reberi Olga Baldina.
«2014 senesi Qırım Cumhuriyetinde, cedvel boyunca, 1,89 mln insan yaşağan edi. Şimdi 1,91 millionlıq eali bar. Areket bar edi – migratsion, tabiiy areket. Qırımda eali artacaq, migratsion areket sayesinde», – dep bildire Baldinanıñ aytqanlarını TASS agentligi.
Onıñ aytqanına köre, 2014 senesiniñ cedveli boyunca, ealiniñ 65%-ı özüni rus, 16%-ı ukrain, 12%-ı qırımtatarı olaraq tanıttı.
Onıñ malümatına köre, regionda 175 millet yaşay. Baldiina, Qırımda ealini kelecek sene aprel ayında cedvelge alıp başlaycaqlar, dep qoştı.
Ukraina Baş prokurorı ofisiniñ matbuat hızmeti malümatına köre, Rusiyeniñ Qırım işğali vaqtında yarımadanı aman-aman 48 biñ insan terk etti. Aynı vaqıtta rusiyeliler yarımadanı faal sürette müstemlekeleştire. Mart ayında Krımstat, resmiy malümatqa köre, yarımadağa Rusiyeden 2014 senesinden soñ 172 biñden çoq kişi keldi, dep bildirdi: 96 biñi Qırımda, 76 biñi Aqyarda qayd oldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
