"Qırım musulmanları davası"nıñ figurantı Aleksandr Sizikov Rusiye tarafından insan aqları bozuluvları ve arbiy cinayetlerniñ qurbanıdır, dep bildirdi KrımSOS talilcisi Yevğen Yaroşenko.
"Bir dava içinde insan aqları bozuluvlarınıñ ve arbiy cinayetlerniñ bir sıra çeşitlerini köre bilemiz: qanunsız şekilde evge kiriş, cinaiy taqip, azatlıqtan marum etüv, işğal etilgen topraqlardan sürgün etüv, insaniyetsiz muamele, ayat ve sağlıq içün telükeli ve daa çoq şey. Bu tek bir adise degil, işğalci devletniñ qırımtatarlarğa, musulman cemiyetlerine, vatandaş faallerine ve işğalci akimiyetniñ areketlerine qarşı çıqqan er keske nisbeten repressiv siyasetiniñ bir qısmıdır", — dep qayd etti talilci.
Yaroşenkonıñ aytqanına köre, "Hizb ut-Tahrir davası"nıñ dörtünci Bağçasaray gruppasına alâqası olğanı ile qabaatlanğan Sisikovnıñ davasında insan aqlarınıñ bozuluvı qayd etildi. Hususan, Rusiye quvetçileri onıñ evinde tintüv keçirip, şahsiy ve aileviy yaşayış aqqını körmemezlikke urdı.
Apiske alınmazdan evel Sizikov siyasiy sebepli cinaiy işler boyunca mahkemelerge barıp, apiske alınğanlarğa, şu cümleden 2018 senesi tutulğan vasiy Edem Smailovğa qoltutqan edi. Bu sebepten qırımlınıñ taqip etilmesi fikir bildirüv, barışıq toplaşuv ve birleşüv serbestligi aqqınıñ bozuluvı olaraq baqıla bile, dep tüşüne talilci.
Sentâbrniñ 13-nde Rusiyeniñ arbiy istinaf mahkemesi bu adamnıñ 17 yılğa apis cezasını belgilegen ükümni tasdıqladı. Ertesi künü işğalciler Aleksandrni tutqanlar. Sentâbrniñ 14-nde aqşam Sizikovnı evinden alıp, Bağçasaray muvaqqat izolâtorına alıp ketti, şeylerini bile cıymağa ruhset bermediler, dep bildirdi anası Yelena. Aleksandr kamera içinde bütünley yañğız edi. Bundan evel Aleksandrnıñ advokatı kör Sizikov toquna-toquna köçip yürgenini ve tek eki künden soñ ayaqyol ve yuvunaq qayda olğanını añlap olğanını ayttı. Sentâbrniñ 19-nda gece onı Aqmescit şeerindeki SİZO-1-ge avuştırdılar.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
