«Krımavtotrans» Suvuq Sala (Gruşevka) köyünde «Gruşevka» tranzit avtostantsiyasını açmağa vade ete, dep bildire müessiseniñ matbuat hızmeti.
«Avtostantsiya 06.30-dan 20.00-ğa qadar çalışacaq. Sudaq, Kefe, Keriç, Aqmescit, Yalta ve Kezlev 53 tranzit seferi andan keçecek. 100 metr kârelik stantsiya binası Qırımnıñ mal-mülki olaraq qayd etildi», – dep aytıla haberde.
«Krımavtotrans» matbuat hızmetiniñ malümatına köre, duraqta sundurma ve oturuv yerleri müessiseniñ parasına qoyuldı.
Qırımnıñ Yedi Quyu rayonında avtobus areketi ve cedvelleriniñ yañı shemaları belgilengen edi.
Qırım avtovokzallarını qoranen sarmağa başladılar. Yerli akimiyetniñ fikirince, böyle tedbirler terrorizm ile küreş telükesizligi içün kerek.
2018 senesi mart ayınıñ başında Aqmescit ve Keriç avtovokzallarında qoralar qoyulğan edi.
«Krımavtotrans» Devlet müessisesiniñ idaresi yolcularnıñ biletsiz keçmesine yol bermemek içün aydavcılar ve avtostantsiya hadimleriniñ teşkerüvine ayrı diqqat etilmeli, dep bildirgen edi.
2017 senesi sentâbr ayınıñ başında işğal etilgen Qırımnıñ Rusiye yolbaşçısı Sergey Aksenov «Krımavtotrans» müessisesiniñ faaliyetini tahqiq etmege talap etken edi. Onıñ malümatına köre, müessise taşımalarınıñ eñ azından yarısı kölgede qala edi.
