"Krımavtodor" müessisesi Ay Petri yaylasına Bağçasaray rayonı tarafından ketken yolnıñ ve istinat divarınıñ yer yılışmasınen bozulğan videosını derc etti.
Müessisede, anda yol areketi yasaqlanğanına baqmadan, yerli sakinler bozuq yoldan yürgenlerini haber ete.
"Dağlarda qar irigeni sebebinden bu yol qısmında topraq yılışması daa ziyade ola bile. Ay Petrige barıp yetmek istegenler, beton manialarğa ve yasaq işaretleine baqmadan, bu yoldan köterileler. Bu yol qısmında sıq areket olsa, eşilüv ola bile", - qayd ete "Krımavtodor".
Yol hızmetçileri, Ay Petrige telükesiz köterilüv tek Yalta tarafından olğanını hatırlata.
Rusiye FVN-niñ qırım idaresinde daa evel bildirdiler ki, yasaq işaretleine baqmadan, aydavcılar, Bağçasaray tarafından tamirge qapatılğan yoldan Ay Petri yaylasına köterile.
