Kosta-Rika "Qırım platforması" halqara meydançıqqa qoşulğan. Bunı Ukrayina TİN yolbaşçısınıñ birinci muavini Emine Ceppar bildirdi.
Diplomat bu format Avropa, Şimaliy ve Cenübiy Amerika, Asiya ve Afrikadan 60-tan ziyade devlet ve halqara teşkilâtnı birleştirgenini hatırlattı.
Cepparnıñ sözlerine köre, Global cenüp memleketleri sayesinde "Qırım platforması"nıñ kenişlemesi yarımadanıñ işğalden azat etilmesi meselesiniñ bütün dünya içün prioritet olğanınıñ tasdıqıdır.
O qayd etti ki, platforma sayesinde Ukrayina Qırımnı halqara kün tertibine qaytardı ve devletlerniñ bütün koolitsiyasını milliy meraqlar etrafında seferber etti.
Emine Ceppar 2023 senesi Qırım platformasınıñ daa da kenişleycegini bildirdi.
«Qırım platforması» – Ukrayinanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayınağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
