Kosovo Sırbistannıñ bütün devlet hızmetçileriniñ kirişlerini yasaqladı, dep bildirdi iyülniñ 4-nde Sırbistannıñ eski vilâyet tış işler naziriniñ mesleatçısı Etlir Ziberay.
Ziberaynıñ aytqanına köre, Priştina bu şekilde Sırbistan tarafından «memleketi ve vatandaşlarına qarşı yapqan propagandası ve sahte haberlerge» cevap berdi, dep haber ete Azatlıq Radiosı.
O, Belgradnı etnik sırblar çoq olğan Kosovonıñ şimalinde «belli bir gumanitar buhrannı» suniy şekilde yapmağa tırışqanında qabaatladı.
Sırbistan progressiv firqası yolbaşçılığında koalitsiyağa kirgen Sırbistan parlamentiniñ deputatı Miroslav Lazanski Azatlıq Radiosında izaat berip, Kosovonıñ qararını Belgrad ve Priştina arasındaki «munasebetlerniñ bozulmasına ciddiy bir adım» dep adlandırdı.
Lazanski Sırbistan Kosovo memurlarına aynısını yapa bile, dep tahmin etti.
2019 senesi mayısta Kosovo Sırbistan baş naziri Ana Brnabiçni arnavutlarğa nisbeten «rasist» laflarında qabaatlap, onıñ kirişini yasaqlağan edi. Brnabiç qabaatını red etti.
Sırbistan ve eski vilâyeti Kosovo arasındaki munasebetler Priştina Sırbistan malına yüz fayızlı gümrük belgilegen soñ kerginleşti.
Kosovo 2008 senesi Sırbistandan mustaqil olğanını ilân etti. Onı ABD ve Ğarpnıñ çoqusı memleketleri tanıy, Kosovonıñ mustaqilligini Sırbistan ve Rusiye tanımadılar. Kosovonıñ mustaqilligini Ukraina da tanımadı. Avropa Birligi Belgrad ve Priştinanı munasebetlerniñ eyiliştirmesine çağırmağa tırışa, faqat şimdilik muzakerelerniñ bir faydası olmadı.
