Yañı koronavirusten ölüm ilk sefer Qıtaynıñ tışında qayd etildi. Filippinde 44 yaşındaki hasta öldi. Bunı Bütündünya sağlıq teşkilâtına atıf etip Azatlıq Radiosınıñ rus hızmeti haber ete.
Soñ malümatqa köre, virustan keçingenlerniñ sayısı 300-den arttı. Yalıñız soñ künde Çinde 45 adam elâk oldı, olarnıñ episi hastalıq yayılıp başlağan Hubei bölgesiniñ sakinleridir. Yoqulanğanlarnıñ sayısı aman-aman 15 biñ oldı. Koronavirus bir aydan az müddette 20-den çoq ülkege tarqaldı.
Rusiyede bu afta ekimler eki yoqulama adisesini qayd etti - Zabaykalye ülkesinde ve Tümen vilâyetinde. Hastalarnıñ ekisi de - Qıtay vatandaşları. Rusiye Qıtaynen sıñrını qapattı, demiryol ve ava alâqasını sıñırladı.
Ekimler, yañı koronavirus ağır pnevmoniyağa sebep ola bilecegini haber etti. Oña qarşı mahsus bir tedaviylev yoq, yalıñız simptomlarını yengilleştirmek mümkün. Hastalıqnıñ ağır forması, ekseriyette, immuniteti zayıf olğan ve esli-başlı adamlarda inkişaf ete.
İndistan ve Filippin akimimiyetleri de ilk koronavirus hastaları aqqında bildirdi ve qalğan memleketler cedveline qoşuldı. Bu cedvelde artıq Avstraliya, Kanada, Finlandiya, Almaniya, Hong Kong, Yaponiya, Nepal, Singapur, Cenubiy Koreya, Tailand, Birleşken Arap Emirlikleri, Vyetnam və Rusiya bardır.
Yanvarniñ 30-ında Bütündünya sağlıq teşkilâtı Qıtay koronavirusını global bir fevqulâde vaziyet dep ilân etti.
Yaqında qayd etilgen virus büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
Daa evel Moğolistan ve Qırğızistan Qıtay sıñırını qapattı, dep bildirdi. Özbekistan, Qazahistan ve Turkmenistan sıñırdaki kontrolni quvetleştirdi. Rusiye işğal etken Qırım ve Aqyarda koronavirus telükesi tarqalğanı içün tevsiyeler çıqarıldı.
