Devam etken koronavirus epidemiyasına baqmadan, işğal altındaki Qırımda sentâbrniñ 1-ne bağışlanğan mektep tedbirlerini keçirmege isteyler. Bu aqta Rusiye kontrolindeki Qırım tasil, ilim ve gençlik naziri Valentina Lavrik avgustnıñ 4-nde yarımadanıñ Rusiye ükümeti toplaşuvında bildirdi.
Onıñ aytqanına köre, Qırımda 1-11 sınıf talebeleri içün birinci ders Ekinci cian cenkinde qazanılğan ğalebeniñ 75-inci yılına bağışlanacaq.
«Bilgi künü sentâbrniñ 1-nde olacaq, birinci ders Ulu Vatan cenkinde qazanılğan ğalebeniñ 75-inci yılına bağışlanacaq. 1-11 sınıf talebeleri içün bayram tedbiri ötkerilecek ve birinci çañ qaqılacaq. Tedbirni açıq avada sotsial mesafeni qorup keçirmege planlaştıramız», – dedi Lavrik.
Rusiye kontrolindeki yarımada akimiyetiniñ malümatına köre, avgustnıñ 4-ne qadar Qırımda 1323 yañı koronavirus hastası qayd etildi. 73-ü çetelden keldi, 109-ı qomşu Rusiyeden kelgenler ve olarnen alâqada olğanlar, 973 tibbiy yardım içün muracaat etkende ve qayd etilgen hastalarnen alâqada olğanı içün belli oldı, 168-i sağlam insanlarnıñ laborator skriningi neticesinde belli oldı. 945 insan yahşı oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
