Qırımnıñ Rusiye yolbaşçısı Sergey Aksenovnıñ bildirgenine köre, regionda koronavirus hastalarınıñ sayısı eksilmey. Bu aqta o, avgustnıñ 10-nda Qırımnıñ Nazirler şurası toplaşuvında ayttı.
«Şimdi aftalıq dinamika nasıl olacaq baqacaqmız. 3-5% deñişmeler bar, faqat hasta sayısı şimdilik eksilmey. Amma iş şaraitlerini deñiştire bilecegimiz saalarnı baqmaq kerek, yımşatmağa degil, böyle zor şaraitlerde çalışuv imkânını ğayrıdan baqmalımız», – dedi Aksenov.
Qırımda keçken künü COVID-19 hastalarınıñ sayısı arttı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
