Qırımda keçken künü 368 yañı koronavirus hastası qayd etildi. Bu aqta Moskva kontrolindeki Qırım yolbaşçısı Sergey Aksenov bildirdi.
Bundan ğayrı, Qırımdaki Rusiye Sağlıq nazirliginiñ malümatına köre, 14 koronavirus hastası avgustnıñ 2-nde vefat etti.
«Avgustnıñ 2-nde Qırım Cumhuriyetinde 368 yañı koronavirus hastası qayd etildi. 339 insan tibbiy yardım içün muracaat etkende qayd etildi, 29 kişi daa evel qayd etilgen hastalarnen alâqada oldı», – dep aytıla Aksenovnıñ içtimaiy ağlardaki saifesinde.
Bir künde 190 insan tüzeldi.
Tünevin saba 373 yañı koronavirus hastası qayd etildi. Avgustnıñ 1-nde 10 koronavirus hastası vefat etti.
Qırımda avgustnıñ 1-nde koronavirus yuqunçınıñ tarqaluvınen bağlı yañı sıñırlavlar çalışıp başladı. Laf birinciden bala lagerleri aqqında kete.
Qırım ve Aqyardaki Rospotrebnadzor idaresiniñ malümatına köre, yarımadada eki aftadan berli COVID-19 hastalarınıñ sayısına köre Sudaq lider ola.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
