Odesa, Lugansk ve Zaporijjâ vilâyetlerinde ilk koronavirus hastaları qayd etildi, dep bildire martnıñ 25-nde saba Ukraina Fevqulâde vaziyetler devlet hızmeti, dep haber ete Azatlıq Radiosı.
Hızmetniñ malümatına köre, bu hastalar martnıñ 24-nde yapılğan talilden soñ belli oldı.
«Martnıñ 24-nde 29 COVID-19 koronavirus hastası laboratoriyada qayd etildi: Çernivtsi vilâyetinde – 13, Kyiv vilâyetinde – yedi, Zaporijjâ vilâyetinde – eki. Ternopil vilâyetinde – eki, Kyivde – eki, Volın vilâyetinde – bir, Lugansk vilâyetinde – bir ve Odesa vilâyetinde – bir», – dep aytıla haberde.
Aynı vaqıtta Odesa vilâyetiniñ devlet memuriyeti bu vilâyette tasdıqlanğan hastalar olğanını inkâr ete.
«Skrining-talillerde ve ekspress-testlerde şübheler Odesadaki Sağlıq nazirliginiñ laboratoriya merkezinde tasdıqlanmalı. Al-azırda böyle bir tasdıqlav yoq», – dep bildire Odesa vilâyeti devlet memuriyetiniñ matbuat hızmeti.
Böylece, Devlet fevqulâde vaziyetler hızmetiniñ malümatına köre, martnıñ 25-nde saba saat 7:00-da Ukrainada 113 COVID-19 koronavirus hastası 13 vilâyette ve Kyivde qayd etildi: Çernivtsi vilâyeti – 38 (bir kişi öldi), Kyiv – 31, Kyiv vilâyeti – 38 (bir insan öldi), İvano-Frankivsk vilâyeti – beş (bir insan can berdi), Ternopil vilâyeti – dört.
Dnipropetrovsk, Zaporijjâ, Lviv ve Jıtomır vilâyetlerinde (bir ölüm olğan) ekişer hasta, birer hasta Volın, Donetsk, Lugansk, Odesa ve Çerkası vilâyetinde. Çernivtsi vilâyetinde bir insan hastahaneden çıqarıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
