Ukrainada iyülniñ 17-nde 847 yañı koronavirus hastası qayd etildi, 21 insan bu hastalıqtan vefat etti, 756 kişi tüzeldi. Bunı Milliy telükesizlik ve mudafaa şurasınıñ koronavirus epidemiyasınıñ tarqaluv monitoring sistemasınıñ malümatı köstere, dep haber ete Azatlıq Radiosı.
Eñ çoq yañı hasta Lviv ilâyetinde (137) ve Kyivde (108) qayd etildi.
Ukrainada 58 111 insannıñ koronavirusı qayd etildi, 1477 kişi vefat etti, 30525 kişi tüzeldi.
Bir qaç künden berli künde 800-den çoq yañı hasta qayd etile. Aynı raqamlar iyülniñ 16-nda (809) ve iyülniñ 15-nde (848) bar edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
