Qırımda dört mektep ve 74 sınıf koronavirus sebebinden karantinge qapatıldı, dep bildirdi sentâbrniñ 30-nda Rusiye kontrolindeki ükümetiniñ tasil naziri muavini Ayder Ablâtipov Qırımda bu yuqunçnıñ tarqaluvı ile küreş operativ ştabınıñ toplaşuvında.
Onıñ aytqanına köre, İslâm Terek rayonında eki mektep ve Aluşta ve Kefede birer mektep qapatıldı.
Bunıñnen beraber, bir yasli bala bağçası ve bir qaç gruppa qapatıldı.
«Bala bağçalarına qatnağan ve karantinge bulunğan 657 insan bar, 2666 mektep talebesi uzaqtan oquy», – dedi memur.
Sentâbrniñ 23-nde berilgen malümatqa köre, Qırımda koronavirus sebebinden 46 mektep sınıfı uzaqtan tasil ala. Qırımnıñ Rusiye yolbaşçısı Sergey Aksenovnıñ aytqanına köre, mekteplerde uzaqtan tasil rejimine qaytmaq qararı yoq.
Keçken künü Qırımda 90 koronavirus hastası qayd etildi. Umumen Qırımda, akimiyetniñ malümatına köre, 4564 yañı koronavirus hastası qayd etildi, 105-i çetelden keldi, 128-i qomşu Rusiyeden kelgenler ve olarnen bağda olğanlar, 2808 insan tüzeldi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
