Aqyarğa kiriş ve çıqışnı bütünley qapatalar. Artıq şeerge sadece kiriş kâğıtınen kirmek ve çıqmaq mümkün, bildirdi şeer başı Mihail Razvojayev.
"Tünevin eñ sert rejimni kirsettim: şeer kirişinde mecburiy pasport nezareti. Kiriş ve çıqış sadece iş kiriş kâğıtı ile yapılacaq. Yarından başlap kâğıtsız kimseni yibermeycekler", - bildirdi Razvojayev.
O bildirdi ki, yüksek sıcağı olğan adamlarnı birden №9 hastahanesine ya da infektsiya hastahanesine yollaycaqlar.
"Yazıq ki, koronavirus hastalarınıñ artması - adamlarnıñ soylarına, şeege se şeer sakinlerine ğamsız munasebetiniñ neticesidir", - dedi Razvojayev.
Aprelniñ 14-nde saba koronavirus hastalığı sebebinden 606 insan ekimlerniñ közetüvi altında buluna.
Aqyarda vatandaşlar özüni izolâtsiya etüv rejimini bozğanları içün 24 protokol tizildi. Rusiye mahkemesi memuriy davalardan biriniñ qararını bu afta çıqarmağa niyetlene.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
