Qırım ve Aqyardaki Rusiyeniñ Cezalarnı yerine ketirüv federal hızmetiniñ idaresi Aqmescit SİZOsında COVID-19 hastaları aqqında malümat doğru degil, dep bildire. Bu aqta Rusiye apishane vekilleri Qırım.Aqiqatqa bergen cevabında ayttı.
Olarnıñ malümatına köre, müessiselerde qısqa ve uzun körüşüvler toqtatıldı, yollamalar alınmasında epidemiyağa qarşı tedbirler quvetleştirildi.
Daa evel advokat Ayder Azamatov Aqmescit SİZOsında tutulğan müvekkili İsmet İbragimovnen subetleşip, SİZOda COVID-19 hastaları qayd etilgen 10 kamera karantinde buluna, dep bildirdi.
«Qırım aq qorçalayıcı gruppası» da Qırımda Aqmescit SİZOsınıñ eñ az on kamerası karantinde buluna, dep bildirdi.
Keçken künü Qırımda 138 koronavirus hastası qayd etildi, 23-üniñ hastalıq alâmetleri yoq edi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
