Qırımda hastalarnıñ ekseriyeti 30 yaşından 60 yaşına qadar insanlardır, dep bildirdi Qırım ve Aqyardaki Rospotrebnadzor idaresiniñ yolbaşçısı Natalya Penkovskaya noyabrniñ 18-nde COVID-19 ile küreş operativ ştabınıñ toplaşuvında.
«Olar umumiy Qırım köstergiçinden 1,5-2 qat ziyadedir. Yani – ealimizniñ eñ faal qısmı, olar şahsiy qoruv vastalarını qullanmay ve diger talaplarğa riayet etmey», – dep ayta o.
Rusiye kontrolindeki Qırım yolbaşçısı Sergey Aksenovnıñ aytqanına köre, koronavirus hastalığı tarqalğanı içün Qırımda yañı yıl korporativleri ve bayram furşetleri lâğu etilecek.
Onıñ malümatına köre, dekabrniñ soñunda akimiyet gece Qırımda bar ve restoranlarnıñ işini de yasaqlamağa niyetlene.
Rospotrebnadzor, yañı koronavirus hastalarınıñ sayısı dekabrniñ ortasında pek artacaq, dep bekley.
Keçken künü Qırımda 211 koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
