Aqmescitteki Kebir Cami aprelniñ 24-nde açıq, amma musulmanlar içün mubarek olğan Ramazan ayınıñ birinci künü anda müminler yoq, cami yanında bir maşina da körünmey, dep haber ete Qırım.Aqiqat mühbiri.
Onıñ malümatına köre, cami kirişi açıq, amma yolqapısında cuma namazı olmaycaq, dep ilân etilgen. Aşağıda daa bir ilân bar, koronavirus telükesi sebebinden Müftilik (Rusiye kontrolindeki Qırım ve Aqyar musulmanları diniy idaresi – QA) aprelniñ 12-ne qadar camilerde cuma namazlarını lâğu etti.
Mühbirniñ qayd etkenine köre, daa bir Aqmescit camisi aprelniñ 30-na qadar qapatıldı.
Daa evel QAMDİ koronavirus telükesi sebebinden yarımada camilerinde namaz qılınuvını ve maarifçilik tedbirleriniñ keçirilüvini yasaqladı.
Aprelniñ 24-üne keçer gecesi dünya musulmanları mübarek Ramazan ayını qarşıladı.
Ramazan – musulmanlarnıñ oraza ayıdır, bir ay devamında insanlar tañ atqanından kün batqanına qadar aş, suvdan ve mahrem munasebetlerden vazgeçe. Ramazan ayında oraza tutmaq Allahqa daa yaqın olmaq ve zorluq çekkek insanlarnı hatırlamaqtır.
Dünyada 1,8 millionğa yaqın musulman bar, bu dünya ealisiniñ yüzde 24-ü ola. Qırımda tahminen 300 biñ musulman yaşay.
