Qırım yarımadasınıñ sakinleri içün koronavirus yuqunçınıñ tarqaluvınen bağlı «daa beter belâ» olmasın dep, insan ve naqliyat areketi içün Keriç köprü acele qapatılmalı. Bu aqta Qırımtatar Milliy Meclisiniñ reisi Refat Çubarov ayttı.
Onıñ aytqanına köre, Rusiyede koronavirus tarqaluv vaziyeti, hususan büyük şeerlerde, Moskvada, daa beter olacaq.
«Yaqın künlerde Moskvağa kiriş-çıqış sertleştirile bile dep körüne. Bunı is etkenler, Rusiyeniñ büyük şeerleri, hususan koronavirus vaziyeti pek tez kerginleşken Moskva sakinleri Moskvadan uzaq bir yerge ketmege isteycektir. Belki, işğal etilgen Qırımğa keterler», – dep yazdı Çubarov Facebook saifesinde.
O, Qırımnıñ Rusiye akimiyetini Keriç köpründe insan ve naqliyat areketiniñ toqtatıluvı içün acele tedbir almasına çağırdı.
«Unutmañız ki, halqara gumanitar uquqına köre, işğal etken devlet «olğan bütün imkânlarnı qullanıp», ealini azıq mallarınen ve sanitar malzemelernen temin etmeli, ve sanitar ve hastahane müessiseleri ve hızmetleri, işğal altındaki topraqta sağlıq ve cemaat gigiyenasını temin etip qol tutmalı», – dep qayd etti Meclis reisi.
Qırımnıñ Rusiye yolbaşçısı Sergey Aksenovnıñ bildirgenine köre, martnıñ 29-ı sabasına qadar Qırımda yañı koronavirus hastaları qayd etilmedi. Qırımda koronavirus yuqunçı sebebinden 2620 insan tibbiy közetüv altında buluna, olardan 2548-i evde dinamik tibbiy közetüv altında qala.
Hatırlatamız, 2020 senesi martnıñ 28-ne qadar Qırım yarımadasında 20 koronavirus hastası qayd etildi: 15 – Qırımda ve 5 – Aqyarda.
Martnıñ 28-nde Qırımda koronavirus tarqaluvı sebebinden 2414 insan tibbiy közetüv altında buluna.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, Qırımda martnıñ 27-nde saba yedi yañı koronavirus hastası qayd etildi. Böylece hastalanğanlarnıñ sayısı 14 oldı.
Aqyarda ilk beş koronavirus hastası qayd etildi, dep tarif etti martnıñ 27-nde Aqyar Rusiye ükümetiniñ reis vazifelerini vaqtınca eda etken Mihail Razvojayev.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
