Keçken künü Qırımda 97 koronavirus hastası qayd etildi, 10-unıñ hastalıq alâmetleri yoq, dep bildirdi Qırımnıñ Rusiye yolbaşçısı Sergey Aksenov.
«66 hasta tibbiy yardım içün muracaat etkende qayd etildi, 29 insan daa evel qayd etilgen hastalarnen alâqada oldı, 2 kişi çetelden keldi. Bir künde 101 insan yahşı oldı, bütün müddet devamındp 37 521 kişi tüzeldi», – dep bildire Aksenovnıñ aytqanlarını Qırım ükümetiniñ matbuat hızmeti.
Qırımnıñ Rusiye sağlıq nazirliginiñ malümatına köre, keçken künü altı hasta koronavirustan vefat etti, pandemiya vaqtında 1216 kişi keçindi. Müessise, 416 insan ambulator tedaviylevde, 1546 kişi hastahanede buluna, dep bildirdi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya mayıs bayramları vaqtında koronavirus hastalarınıñ sayısı arta bile, dep tenbiledi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
