Qırımda keçken künü 14 hasta koronavirustan vefat etti, tünevin derc etilgen raqamlardan çoq oldı. Bu malümat Qırımnıñ Rusiye sağlıq nazirliginiñ er künlik monitoringinde berile.
Qırım nazirliginiñ malümatına köre, umumen pandemiya vaqtında Qırımda 2385 insan koronavirustan vefat etti. «4748 insan (COVID) ambulator tedaviylevde buluna, 2535 kişi (COVID ve pnevmoniya) hastahanede yata», – dep bildirdi müessise.
Qırımda tünevin 12 insan vefat etti, dep bildirilgen edi, bir kün evelsi ise 15 kişi vefat etti.
Sentâbrniñ 13-nde Qırımda 229 yañı koronavirus hastası qayd etildi, bir kün evelsi qayd etilgen koronavirus hasta sayısına köre daa az. Umumen pandemiya vaqtında Qırımda 74496 insan koronavirusqa oğradı, 64060 insan tüzeldi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
