Qırımda keçken künü 860 yañı koronavirus hastası qayd etildi, tünevin Qırımnıñ Rusiye sağlıq nazirligi tarafından derc etilgen raqamdan daa çoq oldı. Bir künde qayd etilgen hasta sayısı yarımadada pandemiya başlağanından berli kene rekord oldı.
Müessise statistikasına köre, keçken künü 18 hasta koronavirustan vefat etti, bu da tünevinki sayıdan daa çoq. Qırımda pandemiya devamında 3270 insan COVID-19-dan vefat etti.
«Umumen (epidemiya vaqtında – QA) 108 644 COVID-19 hastası qayd etildi. Bir künde 858 insan yahşı oldı, bütün müddet devamında 96 333 kişi tüzeldi», – dep aytıla Qırımnıñ sağlıq nazirligi haberinde.
Noyabrniñ 14-nde Qırımda 851 koronavirus hastası ve 17 vefat aqqında haber etildi.
Oktâbrniñ 20-nde yarımadada koronavirus ile küreş tedbirleri quvetleştirildi.
Bundan evel Qırımda koronavirus pandemiyası sebebinden ilân etilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları kirsetildi.
Noyabrniñ 8-nden itibaren Qırımda pandemiya sebebinden musafirhanelerde, şifahanelerde ve diger yerlerde yer ayıruv ve qaluvnen bağlı yañı qaideler işke tüşürildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
