Qırımda koronavirus hastaları içün hastahane yerleriniñ 95%-ı tolu, dep bildire Qırımnıñ Rusiye ükümeti. Akimiyetniñ malümatına köre, al-azırda 31 hastahanede 3949 yer açıldı.
«Aqcigerlerni suniy avalandıruv – 176 reanimatsiya yeri, 60 reanimatsiya olmağan yer, 1293 yer oksigen bere, 2656 yerde oksigen berilmey», – dep bildire Qırımnıñ Rusiye baş nazir muavini Yelena Romanovskayanıñ aytqanlarını «Krım24».
Qırımnıñ Nazirler şurası saytında bu malümat yoq.
Keçken afta Romanovskaya Qırımda koronavirus hastahaneleri hasta tolu, dep bildirgen edi.
Qırımda bir künde qayd etilgen koronavirus hastalarınıñ sayısında rekord devam ete. Qırımnıñ Rusiye sağlıq nazirliginiñ malümatına köre, keçken künü 526 COVID-19 hastası qayd etile. Pandemiya vaqtında Qırımda bir künde o qadar hasta daa qayd etilmegen edi.
Hasta sayısı artqanı içün Qırım akimiyeti COVID-19 hastaları içün qoşma yerler açıla, dep bildirdi.
Qırımda koronavirus pandemiyası sebebinden kirsetilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları işke tüşürildi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
