Qırımda keçken künü qayd etilgen koronavirus hastalarınıñ sayısı bir kün evelsi olğanından az, dep bildirdi Qırımnıñ Rusiye yolbaşçısı Sergey Aksenov. Onıñ malümatına köre, Qırımda avgustnıñ 19-nda 365 yañı koronavirus hastası qayd etildi.
«303 hasta tibbiy yardım içün muracaat etkende qayd etildi, 60 kişi daa evel qayd etilgen hastalarnen alâqada oldı, 2 hasta çetelden keldi. Bir künde tüzelgenlerniñ sayısı 443 oldı, bütün müddet devamında 56 944 kişi yahşı oldı», – dep aytıla Aksenovnıñ içtimaiy ağlardaki haberinde.
Bir kün evelsi 370 yañı hasta, avgustnıñ 18-nde ise 372 COVID-19 hastası qayd etildi.
Avgustnıñ 18-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya koronavirus ile küreş operativ ştabınıñ toplaşuvında Qırımda iyülniñ ortasından berli koronavirustan vefat etkenlerniñ sayısı yüksek qala, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
