İşğal etilgen Qırımda koronavirus diagnozı tasdıqlanğan 1925 senesi doğğan Aluşta sakini vefat etti. Qadın Aqmescitniñ yedinci şeer hastahanesinde bulunğan edi, dep bildirdi Rusiye kontrolindeki Qırım saqlıq naziri İgor Çemodanov.
«E, vefat etti», – dep ayttı o, Qırım akimiyetine qol tutqan «Krıminform» agentligine.
Hatırlatamız, Rusiye kontrolindeki Qırım yolbaşçısı Sergey Aksenov keçken künü doquz yañı koronavirus hastası qayd etildi, dep bildirdi.
Al-azırda Qırımda 177 koronavirus hastası bar. 22-si çetelden keldi, 18-i – Rusiyeden. 23 insan Rusiyeden kelgenlernen alâqada edi, 114-ü laboratoriyada tasdıqlanğan hastalarnen alâqada oldı. 44 insan tüzeldi. Bir koronavirus hastası vefat etti. Aqyarda 110 COVID-19 hastası bar, eki kişi vefat etti.
Yarımadada mayısnıñ 12-nden itibaren mecburiy maska rejimi kirsetile.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
