Qırım ve Aqyar boyunca Rospotrebnadzor başı Natalya Penkovskaya, bu afta Qırımda koronavirustan ölgenlerniñ sayısı keçke aftağa baqqında arttı, dep bildirdi. Bunı o, COVID-19ğa qarşı areketler operativ ştabınıñ oturışında ayttı.
«Bir afta içinde 36 hasta öldi, keçken afta ise 34. Ölgenlerniñ arasında 85 faizi 65 yaşında büyük olğanlar. Tibbiy yardım içün ise 86 faizi tek eki künden soñ muracaat etti. Evel bu köstergiç 91 faiz edi», – dedi Penkovskaya.
Bundan ğayrı Qırım Rospotrebnadzor başınıñ aytqanına köre, ealige test yapuv köstergiçi pek alçaqtır: 135,1 100 biñ eali içün, indikativ köstergiç içe 200 adam 100 biñ ealige.
Penkovskaya Rusiye nezaretinde olğan Qırımnıñ başı Sergey Aksönovdan «test yapuv köstergiçini arttırmağa buyurğanını» istedi.
Qırımda keçken künü 60 yañı koronavirus hastası qayd etildi, aynı zamanda 1-niñ hastalıq alâmetleri yoq edi, dep haber etti Qırımnıñ Rusiye başı Sergey Aksönov.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
