Rusiye kontrolindeki Qırım ve Aqyar musulmanları diniy idaresi (QAMDİ) Oraza bayramını evde qayd etmege çağırdı.
QAMDİ matbuat hızmeti bildirgenine köre, cuma namazı ve bayram namazı COVID-19 koronavirus yuqunçınıñ tarqaluv telükesi sebebinden lâğu etildi.
«Dindaşlarımızğa muracaat etip, çoq toplaşmamalarını, kezintilerni sıñırlamalarını ve telükesiz mesafeni qorumasını rica etemiz. Özüni izolâtsiya etüv rejimi 65 yaştan büyük vatandaşlar içün qala», – dep aytıla haberde.
Oraza bayramı eki musulman bayramından biri ola.
Ramazan ayınıñ soñki künü musulmanlar adet üzre evlerini cıyıştıra, yañı urba ala, ediyeler ala ve bayram içün ziyafetler azırlay.
Oraza bayramında yaqınlarnı ziyaret eteler, mezarlıqlarğa baralar.
Bu sene mübarek Ramazan ayı koronavirus pandemiyasına rastkeldi: oraza aprelniñ 24-nden mayısnıñ 23-ne qadar devam etecek.
Qırımnıñ Rusiye yolbaşçısı Sergey Aksenovnıñ buyruğına köre, mayısnıñ 25-nde Oraza bayramı munasebetinen raatlıq künü ilân etildi.
Ukraina prezidenti Volodımır Zelenskıy Qurban bayramına ve Oraza bayramına devlet diniy bayramı statusını berecek buyruqnı imzalamağa niyetlene.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
