Qırımdaki Rusiye politsiyasınıñ hadimleri vatandaşlarnıñ observatorlardan qaçmaq ıntıluvlarına yol bermedi. Bu aqta Moskva kontrolindeki Qırımnıñ Sağlıq naziri İgor Çemodanov COVID-19 tarqaluvına qarşı operativ ştab toplaşuvında bildirdi.
«Er kes observatornı ziyaret etmege istemey. Qapular qırıla, çeşit yollarnen kirgenler bar. Amma İç işler nazirliginen beraber operativ çalışamız», – dep qayd etti Çemodanov.
Qırım yolbaşçısı Sergey Aksenov ileride buña yol bermemege ve bozucılarnı mesüliyetke çekmege emir etti.
Aprelniñ 29-nda Aksenov, Qırımğa kelip, mında meskeni ve mülki olmağanlar 14 künge observatorğa alınacaq, dep bildirdi. Onıñ aytqanına köre, kelgenlerniñ observatorlarğa yollanıluvı «deñizge bedava baruv» ola.
Umumen Qırımda 104 yañı koronavirus hastası qayd etildi, Aqyarda – 85, bir hasta vefat etti.
Qırımda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi devam ete. Aqyarda bu rejim mayısnıñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
