Qırımda ve Aqyarda koronavirus yuqunçınıñ tarqaluv telükesi vaziyetinde ealini haberdar etüv köçüci sisteması işletildi. Aqyarnıñ Rusiye ükümetiniñ saytında berilgen malümatqa köre, dinamiklerden ekimlerniñ tevsiyelerine riayet etip, evde qalmağa çağıralar.
«Mobil kompleksler şeerniñ bütün rayonlarını dolaşa. Sakinlerni haberdar etmek içün bütün bağ kanalları qullanıla. Sevmobayl ve Volnamobayl er kün evde qalmaq ricasınen sms yollay. Künde eki kere bunı soqaqta seslendireler», – dep bildire şeer akimiyeti.
Rusiye kontrolindeki Qırım fevqulâde vaziyetler naziri Sergey Şahovnıñ bildirgenine köre, bildirüv sisteması olmağan yerlerde ealini haberdar etmek içün mobil bildirüv kompleksi qullanılacaq.
Martnıñ 31-nde saba Rusiye kontrolindeki Qırım yolbaşçısı Sergey Aksenov koronavirus yuqunçına oğrağan ekinci yerli insan tasdıqlandı, dep bildirdi. Böylece, Qırımda 16 kişi qayd etildi. Olardan 14-ü kelgenlerde, ekisi – yerli. Aqyarda 5 kişi koronavirusnen hastalandı.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Aprelniñ 1-nden itibaren Qırımda cemaat naqliyatı tek saba ve aqşam cedvelge köre olacaq. Aqyar sakinlerine aprelniñ 1-nden itibaren acele vaziyet olmağanda evden çıqmaları yasaqlandı. Martnıñ 31-nde Aqyar akimiyeti şeer kirişlerinde blokpostlar qurdı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
