İlhaq etilgen Qırımda Kezlevdeki sanatoriyde yañı "Pobeda" observatorını açacaq olalar. Bunı mayıs 21-inde koronavirus ile küreş operativ ştabınıñ toplaşuvında Rusiye kontrolindeki Qırım baş nazir muavini Yelena Romanovskaya bildirdi.
"Pobeda" observatorında 100 yer azır. Eger yetmese, daa açarmız. Buyruqlar berildi, Rosgvardiyağa haber etildi. Daa 100 yerimiz bar", - dedi o.
Qırımda observatorlar Kezlev, Yalta, Keriç ve Aqmescitte sanatoriylerniñ esasında açıldı.
Daa evel bildirilgeni kibi Qırımda tünevin 15 yañı koronavirus adisesi qayd etildi, hastalarnıñ arasında ekimler ve balalar bar.
Böylece, Qırımda 314 koronavirus hastası qayd etildi. 25-i çetelden, 31-i qomşu Rusiye regionlarından keldi, 9 adam vefat etti. Aqyarda - 147 COVID-19 adisesi qayd etildi, eki adam öldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
