Qırımda koronavirus yuqunçına oğrağan daa bir insan vefat etti. Bu aqta Qırımnıñ Rusiye Sağlıq nazirligi bildire. Bu malümatqa köre, pandemiya vaqtında 12 hasta COVID-19-dan vefat etti.
«Şimdi tam raqamnı kösteremiz – koronavirustan vefat etkenlerni. Başqa hastalıqlardan çoq insan öle, ve olarnıñ koronavirusı bar, amma ölüm sebebi olmadı – yani hasta yuqunç pnevmoniyasından vefat etmedi – olarnı köstermeymiz», – dep añlattı Qırımnıñ Rusiye sağlıq naziri İgor Çemodanov akimiyetke qol tutqan «Krıminform» saytına.
Müessise malümatına köre, al-azırda 3682 insan koronavirus sebebinden tibbiy közetüv altında buluna, 2618 insan evde dinamik közetüv altında qala, 314 insan hastahanede yata, 750 kişi observatorlarğa alındı.
Keçken künü Qırımda 15 yañı koronavirus hastası qayd etildi.
Rusiye akimiyetiniñ malümatına köre, umumen Qırımda 804 yañı koronavirus hastası qayd etildi. 39-ı çetelden keldi, 95-i qomşu Rusiyeden kelgenler ve olarnen alâqada olğanlar. 596 insan tüzeldi, 31 kişi vefat etti (11-i COVID-19-dan). Aqyarda 254 insan yañı koronavirus yuqunçına oğradı. Al-azırda 43 insan hastahanede buluna. 198 kişi yahşı oldı, 5 insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
