Bir künde Qırımda COVID-19 diagnozı tasdıqlanğan eki hasta vefat etti. Bu aqta Qırımnıñ Rusiye ükümetiniñ matbuat hızmeti bildire.
Sentâbrniñ 12-ne qadar koronavirusı qayd etilgen 38 hasta can berdi.
Berilgen malümatqa köre, 2016 kişi tibbiy közetüv altında buluna, olarnıñ arasında 398-i evde dinamik közetüv altında qala, 1432 kişi hastahanelerde, 186 insan observatorlarda buluna.
Umumen 3149 COVID-19 hastası qayd etildi.
995 insan tibbiy müessiselerde tedaviylene, 2073 tüzelgen soñ yiberildi.
Qırımda sentâbrniñ 11-nde 69 koronavirus hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
