Keçken künü Qırımda koronavirus yuqunçından beş hasta öldi. Bunı Qırımnıñ Rusiye sağlıq saqlav nazirligi haber ete.
Berilgen malümatqa köre pandemiya başlanğandan berli yarımadada COVID-19dan 907 adam ölgen.
Sağlıq saqlav nazirliginde qayd ettiler ki, pandemiya başlanğandan berli Qırımda umumen 35 663 koronavirus hastası qayd etilgen.
Qırımda keçken künü 63 yañı koronavirus hastası qayd etildi, aynı zamanda 8-niñ hastalıq alâmetleri yoq edi, dep haber etti Qırımnıñ Rusiye başı Sergey Aksönov Facebook saifesinde.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
