Qırımda koronavirus pandemiyası şaraitlerinde maska taqmağan cemaat naqliyatı yolcularına ve tükân alıcılarına hızmet köstermege yasaq etildi. Bu deñişmeler Qırımnıñ Rusiye yolbaşçısı Sergey Aksenovnıñ yüksek azırlıq rejimine dair buyruğına kirsetildi. Vesiqa deñişmeleri oktâbrniñ 7-nde ükümet portalında derc etildi.
«(Ticaret ve yolcularnı çeşit naqliyat vastalarınen taşıma saasında çalışqan) şirket, iş adamlarına nefes aluv organlarını qoruv vastalarını qullanmağan (tibbiy ve tibbiy olmağan maska, respirator) vatandaşlarğa hızmet etmemek», – dep aytıla buyruqta.
Bu vesiqadaki sıñırlavlar 2020 senesi dekabr ayına qadar uzatıla.
Qırımnıñ naqliyat nazirligi bildirgenine köre, oktâbrniñ 1-nden itibaren koronavirus yuqunçınıñ tarqaluvına qarşı qoşma tedbirler kirsetile. Qırım avtostantsiyalarınıñ hadimleri, cemaat naqliyatınıñ aydavcıları ve yolcuları, taksiciler maska ve qolçaq qullanmalı.
Oktâbrniñ 7-nde Rospotrebnadzor idaresi Qırımdaki vokzallarda kassir ve kontrolciler maska rejimini boza, dep bildirdi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
