Aprelniñ 20-ne qadar Qırımda yañı koronavirus yuqunçı sebebinden 183 insan observatorlarğa alındı. Bu aqta Rusiye kontrolindeki Qırım Sağlıq nazirligi bildire.
Müessise malümatına köre, 1655 insan tibbiy közetüv altında buluna, olardan 1399-ı evde dinamik közetüv altında qala, 73 kişi hastahanede buluna.
Umumen Qırımda 45 COVID-19 hastası bar. 23 kişi tedaviylene, 22-si tüzelip yahşı oldı.
Aprelniñ 19-nda berilgen malümatqa köre, 1809 insan tibbiy közetüv altında bulundı, 168 insan observatorlarğa alındı.
Aprelniñ 20-ne qadar yarımadada 63 koronavirus hastası qayd etildi, 18-i – Aqyarda.
Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
