Keçken künü Qırımda koronavirus yuqunçından 7 hasta öldi, pandemiya başlanğandan berli ise 839, dep haber ete Qırımnıñ Rusiye sağlıq saqlav nazirligi.
“2606 insan (COVID) ambulator tedaviylevde, 1924 kişi (COVID ve pnevmoniya) hastahanede buluna, 0 insan observatorlarğa alındı. Pandemiya başlanğanından berli Qırımda umumen 33977 COVID-19 hastası qayd etildi, 29613 kişi tedaviylengen soñ yiberildi ” – dep yazıla müessiseniñ beyanatında.
Hatırlatamız ki, Qırımda keçken künü 149 yañı koronavirus hastası qayd etildi.
Qırımda COVID-19 hastalarınıñ sayısı eksilmege devam etse, koronavirus pandemiyası sebebinden kirsetilgen sıñırlav tedbirleri baarge doğru lâğu etilecek, dep bildirdi fevralniñ 10-nda Qırımnıñ Rusiye yolbaşçısı Sergey Aksönov COVID-19 ile küreş operativ ştabınıñ toplaşuvında.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
