Qırımda COVID-19 hastalarınıñ sayısı eksilmege devam ete – keçken künü 258 yañı hasta qayd etildi, bir kün evelsi qayd etilgen hasta sayısı ziyade edi, dep bildire Rusiye kontrolindeki Qırım yolbaşçısı Sergey Aksönov içtimaiy ağlardaki saifelerinde.
«Hasta olğanlarnıñ umumiy sayısından 211 hasta tibbiy yardım içün muracaat etkende qayd etildi, 47 kişi daa evel qayd etilgen hastalarnen alâqada oldı. Bir künde kişi tüzeldi, bütün müddet devamında 61 549 insan yahşı oldı», – dep yazıla haberde.
Hatırlatamız, sentâbrniñ 1-ndу qayd etilgen 263 yañı koronavirus hastası aqqında haber etilgen edi.
Avgustnıñ 25-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya koronavirus tarqaluvı ile küreş operativ ştabınıñ toplaşuvında Yañı Qapu rayonı, Yalta, Aluşta, Aqşeyh rayonı, Kefe, Canköy rayonı ve Kezlevde COVID-19 hasta sayısı yüksek seviyede qala, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
