Qırım ve Aqyar boyunca Rospotrebnadzor idaresi koronavirus hastalığı aqqında tevsiye bermek içün "acele hat"nı açtı, bildire Aqmescit memuriyeti.
Beyanatta aytılğanı kibi, "acele hat" koronavirus hastalığı qayd etilgen ülkelerde qaytqan adamlar içün açılğan.
"Acele hat"nıñ nomeri +79789191123, Rospotrebnadzornıñ yekâne konsultatsiya merkezi: 8 800 555 49 43.
Hatırlatamız ki, Qırımda 58 adam koronavirusta şübelengeni içün karantinde buluna.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
