Rusiye kontrolindeki Qırımnıñ emek ve içtimaiy qoruv naziri Yelena Romanovskaya aprelniñ 30-nda ağır koronavirus hastalarınıñ sayısı arttı, dep bildirdi.
Bu aqta o, COVID-19 ile küreş operativ ştabınıñ toplaşuvında ayttı.
«Bugünki künde 1848 insan tibbiy közetüv altında buluna, soñki künde yüz kişi közetüvge alındı, 96 insan közetüvden çıqarıldı. Qırımda 92 COVID-19 testi müsbet çıqtı. 35 kişi tüzelip hastahaneden çıqarıldı ve 57-si hastahanede tedaviylene. Ne yazıq ki, ağır hastalarnıñ sayısı üçke arttı. Üçü de oksigenge bağlı. Aluştalı qartana aqcigerlerni suniy avalandıruv cihazına bağlı qala. Bugün dört hasta hastahaneden çıqmağa azırlana», – dep tarif etti Romanovskaya.
Daa evel berilgen malümatqa köre, Aluştada 1925 senesi doğğan qadın koronavirusqa oğradı, kimden yuqqanı belli degil.
Qırımda aprelniñ 30-nda daa üç yañı COVID-19 hastası qayd etildi. Aqyarda qayd etilgen 77 koronavirus hastası bar.
Qırımda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi devam ete. Aqyarda bu rejim mayısnıñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
