Qırımda 2801 insan tibbiy közetüv altında buluna, 62 insan – hastahanede, 10 kişi – observatorlarda.
Bu aqta martnıñ 30-nda Qırımnıñ Rusiye sağlıq naziriniñ muavini Anton Lâskovskiy Qırımda koronavirus tarqaluvına qarşı er künlik toplaşuvında ayttı.
Martnıñ 27-nde işğal etilgen Qırımda restoran, qave, bar, aşhane, bufet ve diger aş müessiselerini vaqtınca qapatmağa qarar alındı. Sımarış berip almaq ve evge sımarış etmek imkânı olacaq.
Qırım akimiyeti esli-başlı insanlarnı (65 yaştan büyük) ve hronik hastalığı olğan insanlarnı tatil aftasında (martnıñ 28-nden aprelniñ 5-ne qadar) özüni tecrit etmelerine mecbur etti.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
