Qırımda aprelniñ 14-nde saba yañı koronavirus hastaları qayd etilmedi, 2365 insan tibbiy közetüv altında buluna.
Bu aqta Qırımnıñ Rusiye sağlıq naziri İgor Çemodanov Qırımda koronavirus yuqunçınıñ tarqaluvına qarşı operativ ştab toplaşuvında ayttı.
Onıñ qayd etkenine köre, 2141 insan evde dinamik közetüv altında buluna, 61 kişi hastahanede qala, 14 insan ketirildi, 383 kişi közetüvden çıqarıldı.
«Kezlevdeki observatorda 30 insan, Ermeni Bazarda 134 insan buluna», – dep qoştı memur.
Daa evel berilgen malümatqa köre, aprelniñ 14-ü sabasına qadar Aqyarda yañı koronavirus hastaları qayd etilmedi, 606 insan ekimlerniñ közetüvi altında buluna.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
