İşğal etilgen Qırımda 212 insan ekimlerniñ nezareti altında, 16 kişi izolâtorda buluna.
Bu aqta Qırımnıñ Rusiye sağlıq naziri İgor Çemodanov koronavirus tarqaluv telükesi ştabınıñ toplaşuvında er künlik maruzası vaqtında bildirdi.
Nazirniñ bildirgenine köre, bütün hastahaneler viruslarğa qarşı ilâclarnen temin etildi ve yañı ilâclarğa ihtiyacları yoq.
Qırımdaki Rospotrebnadzor idaresiniñ malümatına köre, martnıñ 19-na qadar monitoring devamında 1183 insan yañı koronavirus yuqunçı (COVID-19) talilinden keçti.
Koronavirus yuqunçı tarqaluvınıñ ögüni almaq içün işğal etilgen Qırımda ve Aqyarda «yüksek azırlıq» rejimi kirsetildi.
Qırımnıñ Rusiye yolbaşçısı Aksenovnıñ bildirgenine köre, Qırımda koronavirus hastaları qayd etilmedi.
Qırımda martnıñ 17-nden başlap sport, eglence ve diger kütleviy tedbirlerniñ keçirilüvi yasaqlana. Aqyarda martnıñ 19-ndan başlap bütün mektepler qapatıla, aliy oquv yurtları ise martnıñ 16-nda uzaqtan tasilge keçti.
Rusiye FSBsiniñ sıñır idaresi martnıñ 18-nde saat 00-dan başlap «çetel vatandaşlarını» esas Ukrainadan Qırımğa kirsetmey.
Qırımda koronavirus qayd etilgen memleketlerden kelgenler içün tevsiyeler çıqarıldı.
