Qırımda koronavirus tarqaluvı telükesi sebebinden 2041 insan tibbiy közetüv altında buluna, 1808-i evde dinamik közetüv altında qala.
Qırımnıñ Rusiye ükümeti bildirgenine köre, 72 insan hastahanege alındı, 161 kişi – observatorlarğa. Rospotrebnadzor malümatına köre, 40 COVID-19 hastası qayd etildi. 21-i tüzeldi.
Aqyarda aprelniñ 17-nde saba yañı COVID-19 hastaları yoq. 82 insan yuqunç hastahanesinde buluna, 1376 kişi yaşağan yerinde közetüv altında qala.
Qayd etilgenine köre, observator olaraq çalışqan «İzumrud» pansionatına Daşa Sevastopolskaya hastahanesiniñ hastaları ve hadimleri, dördünci şeer hastahanesiniñ tibbiyet hadimleri ketirildi. Svâto-Georgiyevskiy manastırında 21 insan tibbiy közetüv altında buluna.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
